தியாகராயபுரத்து
தியாகக் கொழுந்தே!
உயிர் காக்கும் பணியில்
உயிர் நீத்த சகோதரனே!
உனது உயிர்த் தியாகம்
உயர்வான தியாகம் !
உள்ளத்தை உலுக்கிவிட்ட
உருக்கமான சோகம்!
ஆயுதம் தாங்கி புரிவதல்ல ஜிஹாத்
மானுடம் காக்க மரணிப்பதே ஜிஹாத்
மீட்புப் பணிக்குச் சென்று
மீளாத் துயிலில் ஆழ்ந்தவனே!
சமுதாயச்சேவைக்கு சென்ற உனை
சாவு அழைத்துக் கொண்டதோ !
மன்னுயிர் காக்க;
இன்னுயிர் காக்க;
தன்னுயிர் ஈந்த
மண்ணுலக மாணிக்கம் நீ!
தீண்டத்தகாதவற்றை எல்லாம்
தீண்டி அப்புறப்படுத்திய உன்னையே
தீண்டிவிட்டது விஷப்பூச்சி !
விஷப்பூச்சிக்குத் தெரியுமா – உன்
வீரியமிக்க களப்பணி ?
விளையாட வேண்டிய வயதில்
களமாடிய உன்னையே
களவாடிவிட்டது அந்த ஜந்து!
தேச நலனுக்காக உயிர்விட்ட
தியாகிகளின் வரிசையில்
தீர்க்கமாய் உன்பெயரும் இடம்பெறும்.!
இம்ரான்..... - இவன்
இதயத்தில் என்றென்றும்
வீற்றிருப்பான்
- அப்துல் கையூம்
--------------------------------------------------------------------------------
இதனையும் சொடுக்கி (கிளிக் செய்து ) படியுங்கள்
No comments:
Post a Comment