- ஷேக் அப்துல்லாஹ் -
பத்தாம் வகுப்பு பெயில்
அரேபியாவிலிருந்து
அப்பா எழுதினார்
“பாஸ்போர்ட்டுக்கு விண்ணப்பிக்கவும்”
விமானமும் விசாவும்
கிளர்ச்சியூட்டியக் கனவுகளில்
பில்கேட்ஸ் பாவம்
பிச்சைக் காரனாக
விழுவதற்குள் ஆவியாகும்
பாலைவனத்தூறல் மாதிரி
எழுவதற்குள் காணாமல் போனது
கனவு
கழிவறை சுத்தம் செய்யும்
கைத் தொழிலொன்றில்
அப்பாவும் நானும்
அழுக்கானதில்
சுத்தமானது – வீட்டு வறுமை
ஆசையும் மோகமும்
தொண்ணூறு நாட்கள்
அரேபியன் கொடுத்த லீவு
அறுபது நாட்கள்
எந்த விலக்கப்பட்டக்
கனியைத் தின்றோம்
சபிக்கப்பட்டது – எங்கள்
இளமை?
நானில்லையெனத் தெரிந்தும்
நானாக இருப்பேனோ – என
சாயல் கண்டு ஏமாறும் தாயன்பு!
வெட்கம் விலக்கி
தொலைபேசிக்கும் தெரியாமல்
மனைவி தந்த பதில் முத்தம்!
நெகிழ வைக்கும் மழலை கீதம்
நெஞ்சுறுக வைக்கும் மரணங்கள்
பிழைப்புத்தேடி – வாழ்வை
இழந்தோம்
உறையும் குளிர்
உருகும் வெயில்
நத்தைக் கூட்டிற்குள்
நாலைந்து பேர்கள்!
பழகிப்போன பழைய பசி
காய்ந்த ரொட்டி!
அரேபியனிடம் அடகு வைத்த
சுயமரியாதை!
சகித்து சகித்து
சம்பாதித்தவையெல்லாம்
அரைகிரௌண்டில் நிலம்
அதிலோர் வீடு
வயதும் முகமும்
வகுப்பும் படிப்பும்
சரியாய் தெரியாத
குழந்தைகள் இரண்டு
சர்க்கரையும் அழுத்தமும்
சரிவிகிதத்தில்!
வரவுக்காக வந்தோம்
செலவாகிப் போனோம்
பிறிதொரு நாளில்
என் மகன் எழுதினான்
பத்தாம் வகுப்பு பெயில்
வேறு வழியில்லை –
நானும் எழுதினேன் –
“பாஸ்போர்ட்டுக்கு விண்ணப்பிக்கவும்”.
நன்றி :
No comments:
Post a Comment